-->
曾华倩和陶大宇是无线同期训练班同学，早前在商天娥的婚宴上重遇，展开讲不完的话题，当中华倩滔滔不绝的「独身论」大宇全程和应，而大宇面对老同学，坦承当年演艺生涯由「濑嘢」到后悔，幸最后都遇上伯乐，成就多套经典剧集，不致枉费青春！
「小蛇女」
曾：曾华倩 陶：陶大宇
曾：好锺意叫你个名……大宇！其实你觉得喺训练班时自己靓唔靓仔？我同君如都锺意mark你排戏。
陶：系咩？我记得我拍刘嘉玲多，至于个样……我觉得自己嗰时靓仔啲，依家就唔得，嗰时个个都靓啦，你都靓女架！
曾：咁……老实？依家你系带点成熟味道，以前又嫩口得滞！咁我觉得依家好啲！（摆出满意样）
回到o靓妹时
陶：你嗰时好啲（即系话依家唔靓），哈哈，讲笑啫，依家系有味道！因为人大咗，尤其是做演员，要经历过先有味道，娥姐结婚摆酒，见到青云，大家又会讲：「你o靓仔时系咁架……」见到嘉玲，即刻弹晒以前啲画面出嚟，又话佢：「你o靓妹嗰时系咁……」
曾：咁我呢，喺你心目中又系点？
陶：导师系用蛇嚟形容你！你行路「雪雪雪……」好得意！你又o靓妹呢。
曾：即系点？幼稚？你小心啲讲喎！
陶：又唔系幼稚，点讲呢？真系要好小心讲，有少少千金小姐feel，总之系唔好得罪嗰只……
「濑嘢年代」
曾：训练班出嚟发展又点呢？你都拍过唔少经典剧？
陶：起初浑浑噩噩都唔知自己做乜架，第一套拍《生锈桥王》，叫做有个角色，但我表现麻麻，当年细路仔唔专心，有机会又唔珍惜，后来先知道「濑嘢」，之后十年八年都冇表现，出嚟嘅嘢一塌胡涂，事业停滞不前。
曾：上制作部行个圈博个机会都好吖？
扭计扭出祸
陶：虽然我好后悔，但碍于性格问题，我又唔会搵监制倾博出路，所以咪一路等一路反省，直至我遇到「伯乐」邓特希，拍咗佢一连五辑《壹号皇庭》，之后又拍咗几辑《刑事侦缉档案》，事业叫做有啲转机，但我又扭计加人工，学啲师兄跳「草裙舞」，卒之外闯，点知又「濑嘢」，哈哈……
曾：命运就系咁，你又咁样谂，不过，可能要你遇过呢种情况，先会更加珍惜之后嘅嘢！
陶：性格改变命运啦，出咗去我签咗王晶，又畀我拍咗套《纵横四海》，当年喺亚视播都叫好叫座，又有机会同嘉玲合作拍咗套《影城大亨》，大家足足对咗九个月，都好开心，因为我哋自训练班出嚟后，当年先系第一次合作。
「经典‧老模」
曾：睇番训练班历史，我哋个个都有番咁上下成绩。
陶：睇番转头我都拍咗好多深入民心嘅经典剧，好似《壹号皇庭》、《刑事侦缉档案》同《纵横四海》，真系好难得，因为唔系一部，系几部，都算系咁。
曾：如果畀你拣边套剧你觉得最经典？
陶：《刑事》啦！一连拍咗几辑，当年真系好辛苦。
曾：部剧仲为你赢得「师奶杀手」称号，我阿妈当年锺意到你呕呀！哈哈……
曾：你点睇时下嘅新人？以前我哋女仔出嚟嘅渠道唔多，依家就话有《超级巨声》、选美呀、o靓模呀咁。
陶：咁你哋咪变咗封「利是」！（俗称利是为老毛）老模（毛）呀！
曾：咩嘢老模呀！
陶：哈哈……所以我咪话「利是」算啰！哈哈……
曾：o靓模中我几锺意Angelababy。
陶：呢啲已经唔系我杯茶嘞，我都就嚟五十岁。
「同声又同气」
曾：又睇唔出喎，我以为你一早五十（岁）咗，哈哈……虽然五十（岁）啫，你系咁意都讲吓你嘅感情状况。
陶：随缘啦……开心咪得啰！
曾：呢样嘢我又好信你讲喎，因为我都系单身，我真系好随缘啦，我一啲都唔觉lonely，太享受自己呢刻嘅自由，太锺意呢个阶段。其实，我成日谂，人一定要结婚嘅咩？依家我好锺意自我天地，有啲朋友都曾经担心我，成日约我出去饮嘢、食饭，怕我闷喎！我不知几锺意将自己关喺屋企，做想做嘅嘢，唔好烦我添呀，讲真，我一个人都得架，自由度大嘛。
要孝顺妈妈
陶：我都好赞同，但又咁讲，朋友问候，当然多谢关心啦，有时缘分嚟冇得讲，老土讲句，有当然恭喜，冇咪冇啰，一个人都可以享受自由嘅乐趣！
曾：新一年你有咩愿望？我都知你好孝顺阿妈，以前训练班你出名孝顺。
陶：依家我嘅愿望，系想妈妈身体健康啦，老人家啲病开始嚟，今次婚姻失败，反而多咗时间陪阿妈，呢几年我定时会搵阿妈饮茶，以前？三个月先见一次，以前忽略咗，希望依家补番。
扮斗鸡眼阿Sir
华倩和大宇同认为当年训练班很多嘢学，又齐齐取笑教功夫的「斗鸡眼」阿Sir。华倩对教功夫的李家鼎又敬又畏，笑指幸好不是鼎爷做导师，否则个个瘫晒！她更边忍笑边提及一位忘了名字、矮矮哋的阿Sir，大宇即说：「哦，嗰个阿Sir斗鸡眼嘅，佢打功夫时，出拳我哋都惊佢打错隔篱，阿Sir有时出直拳，企隔篱嘅同学就问：『你会唔会打咗落我度o架？你系望我定望佢架？』」大宇更鬼马的即席扮斗鸡眼Sir出拳，笑到华倩腰都弯。
「九男女」
陶：当年阿sir日日教戏都系攞发哥、嘟姐（周润发、郑裕玲）做教材，嗰个年代最红佢两个，我哋好似洗晒脑。
曾：嗰时我哋分日班、夜班，全部夹埋都有四十人，但最后签咗九男九女。
陶：所以我哋咪俗称「九男女」啰！
曾：女仔你觉边个最得？
陶：嘉玲啦！
曾：哗，你好似情有独锺佢喎？你特别锺意嘉玲，都唔放我哋在眼内，当君如冇到？（醋意大发）
陶：我系有个假象啫，因为嗰时教跳舞嘅老师张亨利，佢一定叫嘉玲出嚟示范，乜都有佢架，咪觉得佢得啰。
曾：其实你觉得当时边个会弹出？
陶：边个弹就唔知，但我估自己会签到，因为自己考试成绩都几好，对自己有信心！
